Mënscherechter

Lëtzebuerg setzt sech onermiddlech fir d'Mënscherechter a fir de Rechtsstaat an, mam Zil d'Wäerter vu Fräiheet, Gläichheet an d'Dignitéit vun alle Persoune géint Tyrannei a Willkür ze verteidegen. Dobäi steet eng solidaresch a verantwortlech Aussepolitik am Fokus, déi Ongläichheeten an Onrecht bekämpft. An internationale Gremien (UNO, OSZE, Europarot, …), engagéiert Lëtzebuerg sech fir de weltwäite Respekt vun de Mënscherechter an, dëst op de Fundamenter, déi vun der internationaler Weltuerdnung nom zweete Weltkrich geschafe goufen.

D'Direktioun fir politesch Ugeleeënheete schafft enk mat de stännege Vertriedunge vu Lëtzebuerg zu New York, Genf, Stroossbuerg a Bréissel zesumme fir seng Mënscherechtspolitik ze definéieren an ze promouvéieren. Si ass zoustänneg fir d'Virbereede vun Aarbechtsgruppen am Beräich vun de Mënscherechter, a fir de Suivi vun de Pakter a Konventioune vun der UNO déi an hire Kompetenzberäich falen.

An Zesummenaarbecht mam Ambassadeur itinérant vun de Mënscherechter an op Basis vum Dialog mat privaten Acteuren, strieft den "Plan d'action national du Luxembourg sur la mise en œuvre des Principes directeurs des Nations Unies relatifs aux entreprises et aux droits de l'homme (PAN)" un, national an transnational Entreprisen op hier Verantwortung vis-à-vis vun de Mënscherechter ze sensibiliséieren.

Ënnert der Leedung vum Ambassadeur Georges Santer huet Lëtzebuerg 2019 (bis Mäerz 2020) d'Presidence vun der International Holocaust Remembrance Alliance (IHRA), nees iwwerholl.