Fräi Plazen

All fräi Plaz beim MAE (fir all Karriär) gëtt op der Säit Govjobs.lu verëffentlecht. Wien dorun interesséiert ass dem Ministère fir auswäerteg an europäesch Ugeleeënheeten, Verdeedegung, Entwécklungszesummenaarbecht an Aussenhandel (MAE) seng Talenter a Kompetenzen zur Verfügung ze stellen, ka reegelméisseg dëse Site besichen, a sech hei och iwwer d’Bewerbungsprozedur informéieren.

De Ministère fir auswäerteg an europäesch Ugeleeënheeten, Verdeedegung, Entwécklungszesummenaarbecht an Aussenhandel berécksiichtegt keng spontan Kandidaturen.

Informatiounen zu den aktuelle fräie Plaze beim Ministère kritt Dir ënnert follgender Adress: recrutements@mae.etat.lu 

Den MAE organiséiert all Joer e Concours an e puer Etappe fir Kandidatinnen a Kandidaten ze recrutéieren, déi un enger Karriär am Lëtzebuerger diplomateschen Déngscht interesséiert sinn.

Follgend Opnam-Bedéngunge gëlle fir den diplomatesche Concours:

• Et muss een den allgemengen Deel vum Staatsexame fir d'Carrière supérieure (A1) gepackt hunn.
• Et muss een Titulaire vun engem akadeemeschen Ofschloss oder vun engem Diplom sinn, dee vun enger Ariichtung aus dem Héichschoulwiesen ausgestallt ginn ass an den erfollegräichen Ofschloss vun engem Master-Studium noweist (oder engem equivalenten Ofschloss).
• Et muss een déi Lëtzebuerger Nationalitéit hunn.

Persounen, déi sech am Beräich vun der Entwécklungszesummenaarbecht engagéiere wëllen, kënne sech um  Site vun der Lëtzebuerger Direktioun fir Entwécklungszesummenaarbecht an humanitär Aktioun doriwwer informéieren. Op der Säit Sech engagéieren ginn d'"Appels à candidature" verëffentlecht.

Dat ganzt Joer iwwer proposéiert de Ministère fir auswäerteg an europäesch Ugeleeënheeten, Verdeedegung, Entwécklungszesummenaarbecht an Aussenhandel interesséierte Studenten, déi an enger Ariichtung aus dem Héichschoulwiesen ageschriwwe sinn (minimum am 2. Joer Uni), Stageméiglechkeeten zu Lëtzebuerg oder an enger vun den Ambassaden a Vertriedunge vum diplomatesche Reseau am Ausland.

Dauer vum Stage

• D'Dauer vum Stage ka vun e puer Woche bis maximal 6 Méint an enger Period vu 24 Méint variéieren, mat der Ausnam vu konventionéierte Stagen am Kader vun engem Unis-Studium, déi och méi laang kënne sinn.
• Bezuelte Stage fir Stagë vu méi wéi 4 Wochen

Postuléieren

Interesséiert Studente kënnen eng Lettre de motivation (op Franséisch) an e Curriculum Vitae (am "PDF"- oder "Word"-Format) un d'Adress stagiaires.etudiants@mae.etat.lu schécken, mat der Prezisioun a wéi enger Ambassade oder permanenter Vertriedung si de Stage wëlle maachen.

Well demokratesch Walen d'Grondlag vun all legitimmer Regierung ass, hëlt de Ministère fir auswäerteg an europäesch Ugeleeënheeten, Verdeedegung, Entwécklungszesummenaarbecht an Aussenhandel un de Walbeobachtungs-Missioune vun der Europäescher Unioun an der Organisatioun fir Sécherheet an Zesummenaarbecht an Europa (OSZE) deel.

Interesséiert Kandidaten a Kandidatinne kënnen hir Ufro per E-Mail un d'Adress observations.electorales@mae.etat.lu schécken.

Europäesch an international Organisatioune bidde vill Aarbechtsméiglechkeeten an engem interessanten an internationalen Aarbechtsëmfeld. Egal ob Dir Student, jonke Beruffstätegen, Agent beim Staat oder op der Sich no enger neier Erausfuerderung sidd, d'Europäesch Unioun an international Organisatiounen erlaben Iech wäertvoll berufflech Erfarungen ze sammelen, a dat fir verschidde Profiller.

Méi Informatiounen iwwer déi verschidden international Karriäre fannt Dir hei.

Kontakt: carriere.internationale@mae.etat.lu

Suivéiert och d'Facebook- a LinkedIn-Konte vum Ministère fir auswäerteg an europäesch Ugeleeënheeten, Verdeedegung, Entwécklungszesummenaarbecht an Aussenhandel fir ëmmer iwwer fräi Plazen informéiert ze sinn.