Japan

Aktualiséiert den

Japan ass en Inselstaat an Ostasien, deen aus véier Haaptinselen (Honshu, Kyushu, Shikoku, Hokkaido) an e puer dausend klengen Insele besteet. Tokio ass d'Haaptstad vu Japan an déi gréisst Stad vum Land esou wéi och vun der Welt. Aner wichteg urban Zentere sinn Osaka, Nagoya, Fukuoka a Sapporo. D'Klima reecht vun äiskale Wanteren am Norden op Hokkaido iwwert ee méi geméissegte Klima am Zentrum vun der Insel bis hin zu subtropesche Konditiounen am Süden zu Okinawa. D'Bevëlkerung vun 125 Millioune lieft haaptsächlech an héich urbaniséierte flaache Gebidder, wärend d'Zentere vun den Haaptinsele vu Bierger an dichte Bëscher gepräägt sinn. Als eng vun de gréisste Wirtschaften op der Welt ass Japan Member vum G7 a bekannt fir seng Kompetenzen am High-Tech- a Multimedia Beräich. Japan ass eng konstitutionell Monarchie an eng parlamentaresch Demokratie, mam Keeser Naruhito un der Spëtzt vum Land. D'Amtssprooch ass Japanesch.

Fërderungsbedingungen a praktesch Modalitéiten

1. D'Kandidate sinn eligibel wa si déi follgend Konditiounen erfëllen:

  • Si mussen tëschent uechtzéng (18) an drësseg (30) Joer al sinn, wann d'Demande agereecht gëtt;
  • Si mussen e gültege lëtzebuergesche Pass besetzen an zu Lëtzebuerg wunnen;
  • Si däerfen net vun enger ënnerhaltsflichteger Persoun (z.B. en ënnerhaltsflichtegt Kand) begleet ginn.
  • Si mussen iwwer déi néideg finanziell Mëttel disposéiere fir op der Plaz iwwer d'Ronnen ze kommen (min. 2.500€);
  • Si mussen e gültegen Aller-Retour Billjee hunn oder déi néideg finanziell Mëttel fir sech esou een ze kafen;
  • Si mussen d'Gesondheetskrittären erfëlle fir de Certificat médical ze kréien;
  • Si mussen e Casier judiciare vierge hunn;
  • Sie däerfen nach net um Programm Work & Travel fir Japan deelgeholl hunn;
  • Si mussen zu Lëtzebuerg ugemellt si wann d'Demande eragereecht gëtt.

2. Zousätzlech generell Konditiounen an Obligatiounen, déi ze erfëlle sinn a Beleeg, déi musse virgeluecht ginn:

  • 1 ausgefëllten an ënnerschriwwene Formulaire de demande;
  • 2 Passfotoen;
  • E Pass, dee minimum 15 Méint ab deen Datum vun der Ausstellung vum Visa gülteg ass;
  • E beglaubegten an op Englesch iwwersaten Extrait aus dem Casier judiciaire, deen an deene leschten 3 Méint ausgestallt gouf;
  • E beglaubegte Certificat médical, deen an deene leschten 3 Méint ausgestallt gouf;
  • D'Reservatioun vum Aller-Retour Billjee oder de Beweis, datt een déi néideg finanzielle Ressourcen huet fir een ze kafen;
  • E ënnerschriwwene Motivatiounsbréif op Englesch;
  • E Liewenslaf op Englesch;
  • E Beleeg datt ee minimum 2.500€ besëtzt (Relevé bancaire oder en Nottärsakt dee beweist datt een iwwer dës Zomm disposéiert);
  • E Beleeg, datt ee fir déi éischt 15 Deeg e Logement zur Verfügung huet (Reservatioun vun engem Hotel, wann et eng Privatpersoun ass, en Invitatiounsbréif mat enger Kopie vun der Identitéitskaart);
  • Eng Krankeversécherung, déi de ganzen Openthalt couvréiert, vun enger Héicht vun 30.000€.

3. Wéi kann een seng Demande fir de Visa fir de Programm Work & Travel fir Japan areechen:

Lëtzebuerger Staatsbierger mussen hir Demande am Kader vum Programm Work & Travel un déi follgend Adress areechen:

Ambassade du Japon au Luxembourg

 62, Avenue de la Faïencerie

 L-1510 Luxembourg

 Téléphone: + (352) 46 41 51-1 (Standard)

 Courriel: embjapan@lx.mofa.go.jp

 Internetsäit

4. Weider Informatiounen

  • D'Visae fir de Programme Work & Travel gi just u maximum 100 Lëtzebuerger Participante pro Joer ausgestallt. De Visa ass gratis.
  • D'Visae fir de Programm Work & Travel gëllen nëmme fir eng eenzeg Arees. Wenn den Titulaire vum Work & Travel Visa deemno Japan aus iergendengem Grond verléisst an duerno erëm areese wëll, muss hien ee spezielle Permis fir d'Arees um Flughafe vu sengem Depart ufroen. Méi Informatioune fannt dir ënnert dësem Link: https://www.moj.go.jp/isa/other_languages.html?hl=en
  • D'Participante kréien e Visa fir e laangen Openthalt deen 12 Méint gülteg ass. Et gi keng Verlängerungen oder Modifikatioune vun sou engem Visa doropshin akzeptéiert.
  • D'Visae si vun hirem Ausstellungsdatum un 3 Méint gülteg. Den Demandeur muss also innerhalb vun 3 Méint no der Ausstellung vum Visa a Japan areesen.
  • D'Participanten däerfe fir een oder méi Employeure wärend der Period vum laangwierege Visa schaffen.
  • De Besëtzer vum Visa huet kee Recht op Chômage oder Sozialhëllef.