Ëmsetzung vu restriktive Mesuren

Sanktioune si restriktiv Mesuren, déi géint Regierunge vun Drëttstaaten, natierlech oder juristesch Persounen, Entitéiten oder Gruppen ergraff kënne ginn, fir eng Ännerung vun der Politik (bannen- oder baussepolitesch) oder den Aktivitéite vun den designéierte Staaten oder Persounen erbäizeféieren.

D'Sanktiounen, déi a Lëtzebuerg gëllen, gi vum Sécherheetsrot vun de Vereenten Natiounen – op der Basis vum Kapitel VII – a vum Artikel 41 vun der Charta vun de Vereenten Natiounen oder op EU-Niveau am Kader vun der Gemeinsamer Aussepolitik a Sécherheetspolitik (GASP) beschloss.

D'Sanktioune, déi um Niveau vun de Vereenten Natiounen an duerch den EU-Rot beschloss gi si, ginn op EU-Niveau ëmgesat. Europäesch Reglementer sinn direkt an all Memberstaat uwennbar, ouni datt se an dat nationaalt Recht transposéiert musse ginn. Et ass awer un all Memberstaat, déi néideg Ëmsetzungsmoossnamen ze huelen, besonnesch an de Beräicher, wou d'EU net zoustänneg ass, an déi administrativ a strofrechtlech Sanktiounen ze definéieren, déi bei Verstéiss géint déi restriktiv Mesuren uwennbar sinn.

Sanktioune kënne d'Form vu Waffenembargoen, spezifeschen oder allgemengen Handelsbeschränkungen (z.B. Import- an Exportverbueter), finanziellen Aschränkungen oder Restriktioune vu Finanzdéngschtleeschtungen, Areesbeschränkungen oder aner sektorielle Mesuren huelen.

D'Direktioun fir europäesch Ugeleeënheeten an international wirtschaftlech Bezéiunge vum Ministère fir auswäerteg an europäesch Ugeleeënheeten, Verdeedegung, Entwécklungszesummenaarbecht an Aussenhandel ass zoustänneg fir déi allgemeng Koordinatioun vun den internationale Sanktiounen zu Lëtzebuerg.

De Ministère kommunizéiert mat dem Sanktiounscomitéë vun der UNO, fir d'Informatiounen, déi zur Identifikatioun vu Persounen an Entitéiten op de Sanktiounslëschte bäidroen, weiderzeginn. Déi relevant Informatiounen am Zesummenhang mat den europäesche Sanktioune ginn och duerch de Ministère weidergeleet.

De Büro fir d'Kontroll vun Export, Import an Transitter (OCEIT) vum Ministère ass déi zoustänneg Autoritéit fir d'Erdeele vu Geneemegunge fir Transaktioune wéi Export, Transfert, Transit, technesch Ënnerstëtzung, Brokerage an Import vun Verdeedegungsprodukter, duebel benotzbar Gidder a Foltergidder, souwéi fir Ausnamsgeneemegunge fir strikt zivil Gidder am Kader vun den handelsrechtleche Restriktiounsmoossnamen. Den OCEIT setzt déi vun der Europäescher Unioun decidéiert Handelsbeschränkungen a Bezuch op dës Gidder géint bestëmmte Staaten, politesch Regimmer, Persounen, Entitéiten a Gruppen ëm. D'Direktioun fir politesch Ugeleënheeten vum Ministère huet och e Matentscheedungsrecht bei Exportlizenze fir duebel genotzte Gidder a Verdeedegungsprodukter.

D'Kontaktdaten a weider Informatiounen iwwer d'Roll vum OCEIT fannt Dir op dëser Websäit. Den OCEIT verëffentlecht och reegelméisseg e Newsletter mat deene leschten Informatiounen zu Handelssanktiounen un déi ee sech abonéiere kann.

De Finanzministère ass zoustänneg fir all Froe betreffend (i) d'Ëmsetzung vu Finanzsanktioune vun de betraffene Persounen a vun deenen, déi verflicht sinn, dës Mesuren ëmzesetzen. De Finanzministère ass och zoustänneg fir exceptionell Autorisatiounen ze ginn, déi vun de Verbueter a restriktive Moossnamen ofwäichen, souwäit d'Resolutioune vun de Vereenten Natiounen, d'Akte vun der Europäescher Unioun, an de nationale legale Kader et erlaben an ënner de virgesinne Bedingungen. Méi Informatiounen iwwer d'Roll an d'Kontaktdate vum Finanzministère fannt Dir op dëser Websäit. De Finanzministère verëffentlecht reegelméisseg en Newsletter mat den neisten Updates zu internationale Sanktiounen, op deen een sech abonéiere kann.

Aktuell Noriichten

Am Kader vum Agressiounskrich, dee Russland géint d'Ukrain féiert, huet d'Europäesch Unioun eng Rei vu restriktive Mesuren adoptéiert. Dës nei Mesuren ergänzen déi schonn bestoend Mesuren als Reaktioun op d'Instabilitéit, déi Russland an der Ukrain verursaacht huet, an d' illegal Annexioun vun der Krim am Joer 2014.

D'Mesurë beinhalten zilgeriicht individuell Moossnamen souwéi ëmfaassend sektoriell, wirtschaftlech a finanziell Restriktiounen.

Fir den Entreprisen an aner Acteure bei der Ëmsetzung vun de restriktive Moossnamen ze hëllefen, sinn Outile verfügbar, déi si an hirem Virgeheien ënnerstëtzen.

Nëtzlech Linken

• EU-Rot – EU-restriktiv Mesuren als Reaktioun op d'Situatioun an der Ukrain
• EU-Rot – Chronologie - EU-restriktiv Mesuren als Reaktioun op d'Situatioun an der Ukrain
• Kommissioun – FAQ zu restriktive Mesuren
• Kommissioun – Referenzdokumenter
• Guideline vun der Kommissioun zur Ëmsetzung vun de Bestëmmungen vum EU-Reglement (EU) Nr. 833/2014 (2017)
• Guideline zur Ënnerstëtzung vun den europäeschen Entreprisen an anere Acteure bei der Analys vun de Risikoen vu Verstéiss géint EU-Sanktiounen

Whistleblower-Tool

D'Europäesch Kommissioun stellt e Whistleblower-Tool zur Verfügung, dat d'Meldung vu méigleche Verstéiss géint d'Sanktiounen erliichtert. Et ass eng sécher Online-Plattform, déi et erlaabt Informatiounen anonym iwwer vergaangen, aktuell oder zukünfteg Verstéiss géint d'Sanktiounen, déi vun der EU decidéiert goufen, ze mellen.

Kontakt

Froen un d'Direktioun fir europäesch Ugeleeënheeten an international wirtschaftlech Bezéiunge vum Ministère kënnen un d'follgend E-Mail-Adresse geschéckt ginn: sanctions@mae.etat.lu.

• Iwwerbléck iwwer d'aktuell Sanktiounen
• Konsolidéiert Lëscht vun finanziellen EU-Sanktiounen: Consolidated list of persons, groups and entities subject to EU financial sanctions - Data Europa EU
• Websäit vun den nationale zoustännegen Autoritéiten vun EU-Memberstaaten

Weider Informatiounen: https://www.consilium.europa.eu/de/policies/sanctions/ https://ec.europa.eu/info/business-economy-euro/banking-and-finance/international-relations/restrictive-measures-sanctions_de Guideline zur Ëmsetzung vu restriktive Mesuren (Sanktiounen) - 4. Mee 2018 Bescht Praktike fir d'effektiv Ëmsetzung vu restriktive Mesuren – 24. Juni 2022 Grondprinzippie fir den Asaz vu restriktive Mesuren (Sanktiounen) - 7. Juni 2004